150дөн ашык өлкөдө көрсөтүлөт. Netflix компаниясы Кыргыз өлкөсүнөн тасма тартты

Netflix стриминг кызматы Кыргыз өлкөсүнөн тасма тартты. Бул тууралуу Бириккен улуттар уюмунун өнүктүрүү программасынын Инстаграм баракчасына жарыяланды.

Долбоордун алкагында биздин өлкөгө Голландиядан тасма тартуучу топ келген. Netflix компаниясынын буйрутмасы менен дүйнөнүн 30 өлкөсүндөгү маданий көп түрдүүлүк тууралуу даректүү тасма тартылды - Кыргыз өлкөсүнүн атынан Салбуурун улуттук аңчылыгы чыгат.

"Өткөн жылы “Кыргыз туризм” командасы эл аралык деңгээлдеги журналисттер менен биргеликте БУУнун өнүктүрүү программасынын долбоорунун алкагында бүркүтчү тууралуу бир катар постторду чыгарып, бул темага кызыгууну жаратып, демилгенин башаты болгон. Фильмди экранга чыгаруу 2022-жылга пландаштырылган, тасма 150дөн ашык өлкөдө көрсөтүлөт. Биздин эпизодду миллиарддан ашык көрүүчүлөр көрө алат", - деп айтылат билдирүүдө.

Салбуурун – көчмөн аңчылыктын байыркы түрү. Мергенчилер атты чапкандан кийин тоолорго көп күндүк саякатка чыгышкан. Алар өздөрү менен кошо жалаң бүркүт, тайган жана жаа жебе алып кетишкен. Мындай жортуулдарда кыргыздар мыкты мергенчилерди, жылкыларды, бүркүттөрдү, тайгандарды тапташкан.