Эдил Байсалов: "Кыргыз Республикасы Баткен облусунан башталат"

Министрлер кабинетинин төрагасынын орун басары Эдил Байсалов Баткен облусуна иш сапары менен барып, Лейлек районундагы социалдык объектилердин абалы менен таанышты. Министрлер кабинетинин маалымат кызматынан кабарлашкандай, Эдил Байсалов Ак-Арык айылындагы орто мектептин абалы менен таанышып, имарат капиталдык ремонтко муктаж экенин белгиледи.

Ошондой эле ал Кулунду айылындагы "Кулунду-Нур" балдар бакчасы жана Таир Жолдошев атындагы орто мектептин абалы менен таанышып чыкты.

Лейлек районунун тургундары менен жолугушууда Баткен облусуна өзгөчө көңүл буруларын белгиледи.

"Президентибиз Садыр Жапаров дагы "Баткен – менин жүрөгүмдө" деп айтты. Кыргыз Республикасы Баткен облусунан башталат. Айрыкча, чек арага жакын жайгашкан аймактарды өнүктүрүү министрлер кабинетинин негизги милдеттеринин бири болуп саналат. Башталган иштер сөзсүз аягына чыгарылат", - деди Эдил Байсалов.

Ошондой эле ал Максат айылындагы фельдшердик-акушердик пункттун абалы менен таанышып, COVID-19 илдетинин жайылышына каршы күрөшүү боюнча ыкчам штабдын кезектеги жыйынын онлайн-форматта өткөрдү.