Беларусь Кыргыз өлкөсүнө автобус жана айыл чарба техникаларын жеткирүү жагын караштырмакчы

Министрлер кабинетинин төрагасынын биринчи орун басары Арзыбек Кожошев Беларусь өлкөсүнүн Кыргыз өлкөсүндөгү ыйгарым укуктуу элчиси Андрей Страчко менен жолукту. Бул тууралуу министрлер кабинетинин басма сөз кызматынан кабарлашты.

Жолугушууга Бишкек шаарынын мэри Айбек Жунушалиев дагы катышты.

Жолугушууда Евразиялык өкмөттөр аралык кеңешинин Ереванда өткөн жыйынынын алкагында министрлер кабинетинин төрагасы Акылбек Жапаровдун Беларустун премьер-министри Роман Головченко менен эки тараптуу жолугушуусунда эки өлкөнүн кызматташтыгынын актуалдуу маселелери талкууланды.

Министрлер кабинетинин башчысынын биринчи орун басары кыргыз тарап Кыргыз өлкөсүнө беларусь автобустарын жана айыл чарба техникаларын жеткирүүгө кызыкдар экенин белгилеген.

Өз кезегинде Беларустун Кыргыз өлкөсүндөгү элчиси Андрей Страчко бул маселелерди жакынкы аралыкта иштеп чыгууга даяр экендигин билдирген.

"Биз үчүн бул дагы келечектүү долбоор, биз аны ишке ашырууга кызыкдарбыз", - деген ал.

Жолугушуунун жүрүшүндө тараптар кыргыз-беларусь өз ара аракеттенүүсүнүн актуалдуу маселелерин, анын ичинде кыргыз-беларусь өкмөттөр аралык комиссиясынын алкагында кызматташууну активдештирүү маселелерин талкуулашкан.