Бишкек ШИИББи: "Өмүрбек Текебаевге кол салган окуя боюнча тергөө иши жүрүүдө"

"Ата-Мекен" партиясынын лидери Өмүрбек Текебаевге кол салган окуя боюнча тергөө иши жүрүп жатат. Бул тууралуу Бишкек ШИИББинин маалымат кызматынан билдиришти.

Маалыматка ылайык, бүгүн, 1-декабрь күнү милицияга саат 15:30 чамасында "Park Hotel'дин" жанынан Өмүрбек Текебаевге белгисиз жарандар кол салып, денесине жаракат келтирди деген маалымат келип түшкөн.

Айтылган дарекке Биринчи Май РИИБинин ыкчам кызматкерлери барып, маалыматты тактаганда төмөнкүлөр белгилүү болгон:

Өмүрбек Текебаев "Park Hotel'дин" жанында жүргөн учурда белгисиз жарандар күч колдонуу менен баасы 10 миң сомду түзгөн уюлдук телефонун тартып алышкан. Ошондой эле бет жагына жаракат келтиришкен.

Бул окуя боюнча Текебаев Биринчи Май РИИБине арыз менен кайрылып, кол салган белгисиз жарандарга карата чара көрүп берүүнү өтүнгөн.

Бул факты Биринчи Май РИИБинде 201-берене ("тоноо") менен Кылмыштардын жана жоруктардын бирдиктүү реестрине каттоого алынган. Жаракаттын оордугун аныктоо үчүн соттук-медициналык экспертиза дайындалды. Учурда кол салган жарандардын аты-жөнүн аныктоо, издөө иштери жүрүп жатат.