Кыргыз өлкөсү Түркмөнстандан 2022-жылы дагы электр энергиясын сатып алат

Кыргыз өлкөсү Түркмөнстандан 2022-жылы дагы электр энергиясын сатып алат. Бул тууралуу Энергетика министрлиги маалымдады.

Маалыматка ылайык, министрлик энергетика министри Доскул Бекмурзаев өкмөттөр аралык соода-экономикалык, илимий-техникалык жана гуманитардык кызматташтык боюнча кыргыз-түркмөн комиссиясынын бешинчи жыйынына катышкан.

Анда министр президент Садыр Жапаровдун 2021-жылдын 27-28-июнунда Түркмөнстанга болгон расмий сапарынын алкагында түркмөн тарап менен Кыргыз өлкөсү жаратылыш газын жана электр энергиясын импорттоо боюнча макулдашууга жетишилгенин айтып, 2021-жылдын 1-августунан тарта Түркмөнстандан Кыргыз өлкөсүнө электр энергиясы берилип жатканын белгилеген.

2022-жылга Түркмөнстандан электр энергиясын алуу боюнча дагы келишим түзүлгөн. Доскул Бекмурзаевдин билдиришинче, учурда бул багытта мамлекет башчыларынын жана министрликтердин деңгээлинде сүйлөшүү активдүү жүрүп жатат.