Өмүрбек Текебаев телефонун уурдады деп кармалган адамга карата тосмо арыз жазды

"Ата-Мекен" партиясынын лидери Өмүрбек Текебаев телефонун уурдаган деген шек менен кармалган адамга карата эч кандай дооматы жок. Бул тууралуу ал УКМКнын имаратынын алдында журналисттин суроосуна жооп берип жатып билдирди.

Анын айтымына караганда, телефону ресторандын ичиндеги столдун үстүндө калган.

"Кармалган жигитке карата "тоноо" беренеси менен иш козголгон. Менден телефонду эч ким алган эмес. Телефон ресторанда столдун үстүндө калган. Мен чыккандан кийин кимдир-бирөө алган экен. Бул жагдайдан алганда тоноо эмес. Мага тергөөчүлөр келишет, мен документтерге кол коём, кармалган жигит бошотулат. Ага эч кандай дооматым жок", - деген Текебаев.

Маалымат үчүн:

1-декабрда "Ата-Мекен" партиясынын лидери Өмүрбек Текебаевге кол салуу болгон. Көп өтпөй Текебаев телефонун кайтарып берүү боюнча кайрылуу жасаган.

Садыр Жапаров ИИМге Өмүрбек Текебаевге кол салуу боюнча фактыны иликтеп чыгууну тапшырган. Бишкек ШИИББи Өмүрбек Текебаевге кол салганга шектүү катары 23 жаштагы жаран кармалгандыгын билдирген.

Токмок шаарынын депутаттары аксакал менен чогуу келишип, Өмүрбек Текебаевден кечирим сурашкан.