Түркияда Режеп Тайип Эрдогандын отставкасын талап кылган митинг өттү

Түркиянын түштүгүндөгү Мерсин шаарында миңдеген адамдардын катышуусунда президент Режеп Тайип Эрдогандын отставкасын талап кылган митинг болуп өттү. Бул тууралуу түрк басылмалары жазды.

Маалыматка караганда, митингчилердин мындай талабы өлкөнүн улуттук валютасы болгон түрк лирасынын (ТL) курсунун кескин төмөндөп кетиши жана өлкөдөгү кымбатчылык менен байланышкан.

Ал ортодо Түркиядагы бийликке негизги оппозициялык партиянын лидери Кемаль Кылычдароглу "Биз бардык жарандардын жеңиши үчүн шайлоого аттанабыз жана шайлоо урналарынын жанында азыркы диктатураны кулатабыз. Мен силерге сөз берем", - деген билдирүү таратып, жарандарды азыркы бийликке каршы биригүүгө чакырганы маалымдалды.

Ал эми өлкөнүн түштүк-чыгышындагы Сиирт шаарында өлкө башчы Эрдогандын тарапташтары чогулганы кабарланды. Президент ал жерге барып сүйлөгөн сөзүндө элди улуттук экономикага болгон ишенимди жоготпоого чакырып, өлкөдөгү абалды турукташтырууга убада берген. Ошондой эле мамлекетте өкүм сүрүп жаткан кымбатчылык дүйнөлүк базардагы чийки заттын кымбаттоосунан улам болуп жатканын белгилеген.

Белгилей кетсек, быйыл түрк лирасы долларга карата акыркы 20 жылда болуп көрбөгөндөй арзандап кеткен. Мындан улам оппозициялык партиялар жагдайга президентти айыптап, мөөнөтүнөн мурда шайлоо өткөрүү керектигин айтып чыгышкан. Эрдоган алардын мындай талабын четке кагып, президенттик шайлоо 2023-жылы өз убагында гана болорун билдирген.