Курманбек Бакиевдин үй-бүлөсү баш калкалоо үчүн Лукашенкого 1 миллион 600 миң доллар бергени айтылды

Курманбек Бакиевдин үй-бүлөсү Беларусь өлкөсүндө баш калкалоо үчүн президент Александр Лукашенкого кеминде 1 миллион 600 миң доллар өлчөмүндө каражат берген. Бул тууралуу BYPOL демилгесин иликтеп чыккан авторлор билдиришкендигин ачык булактар жазып чыгышты.

BYPOL - өлкөнүн мурдагы күч түзүмдөрүнүн кызматкерлери тарабынан түзүлгөн жана азыркы Беларусь бийлигине каршы аракеттенген, өлкө башчы Александр Лукашенконун легитимдүүлүгүн тааныбаган атайын күчтөрдүн бирикмеси.

Алар мамлекет башчысына (ред.; Александр Лукашенкого) пара берген бир канча адамдардын аттарын аташкан. Алардын арасында Кыргыз өлкөсүнүн мурдагы президентинин уулу Максим Бакиевдин жубайы Айжан Кененбаеванын да аты аталганы белгилүү болду.

Иликтөөдө алар көп суммадагы акча каражатын Бакиевдердин үй-бүлөсүнүн Беларусь өлкөсүндө баш калкалоосу жана камкордукка алынуусу үчүн берген. Ошондой эле "Расмий Минск Бишкектин кылмышкерлерди өткөрүп берүү өтүнүчүнөн дайыма баш тартып келгендиги үчүн" деп жазышкан иликтөөнүн авторлору.

Андагы маалыматтарга караганда, Бакиевдердин арты менен Лукашенконун автопаркында баасы 1 миллион 400 миң еврону чапчыган Mercedes-Maybach S600 Pullman Guard үлгүсүндөгү автоунаа пайда болгон.

Иликтөөчүлөр аталган унаанын брондолгон катмарын автомат огу тешип өтө албастыгын жана 15 килограммдык тротил жардырса да зыян келбеген өтө кымбат унаа экендигин белгилешкен.

Мындан тышкары Максим Бакиевдин жубайы тарабынан президентке баасы 26 миң 500 долларды түзгөн 2018-жылкы Harley-Davidson үлгүсүндөгү мотоцикл тапшырылганы да маалымдалган.