Министрлер кабинетине социалдык мекемелердин тамак-ашын каржылоону эки эсеге көбөйтүү тапшырылды

Президент Садыр Жапаров "Социалдык чөйрөнүн айрым мекемелеринде тамактанууга чыгымдардын акчалай ченемдерин көтөрүү жөнүндө" жарлыкка кол койду. Бул тууралуу президенттик администрациядан кабарлашты.

Эске салсак, тийиштүү тапшырманы мамлекет башчысы ушул жылдын 3-декабрында Чүй облусунун Москва районундагы Беловодск айылындагы Беловодск балдардын психоневрологиялык социалдык стационардык мекемесине барганда берген.

Ошентип социалдык чөйрөнүн мекемелеринде жашаган ата-энесинин көзөмөлү жок балдардын, ден соолугунун мүмкүнчүлүгү чектелүү балдардын жана адамдардын, улгайган жарандардын тамактануусунун сапатын көтөрүү максатында Кыргыз Республикасынын Конституциясынын 19, 44, 66 жана 71-беренелерин жетекчиликке алып, токтом кылынат:

Кыргыз Республикасынын министрлер кабинети:

1) 2022-жылдын 1-январынан баштап төмөнкүлөрдүн тамактанууга акчалай ченемин 100 пайызга көбөйтсүн:

— Кыргыз Республикасынын Эмгек, социалдык камсыздоо жана миграция министрлигинин мекемелериндеги балдардын, улгайган жарандардын, ден соолугунун мүмкүнчүлүгү чектелүү адамдардын, анын ичинде ден соолугунун мүмкүнчүлүгү чектелүү балдардын;

— Кыргыз Республикасынын Билим берүү жана илим министрлигинин мекемелериндеги жетим балдардын, ата-энесинин көзөмөлү жок балдардын, ден соолугунун мүмкүнчүлүгү чектелүү балдардын;

— Кыргыз Республикасынын Саламаттыкты сактоо министрлигинин адистештирилген реабилитациялоо борборлорундагы (балдар үйлөрүндөгү) балдардын;

2) Ушул жарлыкты ишке ашыруу үчүн кошумча финансы каражаттарын тапсын жана бөлүп берсин;

3) Өзүнүн чечимдерин ушул жарлыкка ылайык келтирсин.