Сокулукта чогулган эл милиция кызматкеринин формасын айрып салышты

Чүйдүн Сокулук райондук милициясынын имаратынын алдына чогулган эл милиция кызматкеринин формасын айрып салышты. Бул тууралуу видео социалдык тармактарга тарады.

Анда Чүй облусунун айылдарынын биринин тургундары чогулушкан. Алар 5-декабрда 17 жаштагы айылдашын зордуктаган жаран эркиндикке чыгарылганын айтып, нааразычылык билдиришүүдө.

Буга чейин Чүй облусунун Сокулук районунда 17 жаштагы кызга кол көтөрүп, зордуктоого шектүү жаран кармалган.

Белгилүү болгондой, кыздын атасы Сокулук РИИБине арыз менен кайрылган. Анда арыз ээси 5-декабрь күнү эртең менен 2004-жылы туулган кызын белгисиз бирөө Бишкек шаарына жумушка жеткирип коюуну убада кылып, жолдон күч колдонуп зордуктап салганын билдирген. Бул факты Кылмыштардын жана жоруктардын бирдиктүү реестрине 154-берене ("зордуктоо") боюнча катталып, сотко чейинки өндүрүш иши башталган.