Түркиянын президенти Режеп Тайип Эрдоган Садыр Жапаровду туулган күнү менен куттуктады

Түркия Республикасынын президенти Режеп Тайип Эрдоган президент Садыр Жапаровду туулган күнү менен куттуктады. Бул тууралуу президенттик администрациянын маалымат кызматынан билдиришти.

“Туулган күнүңүз менен куттуктап, жакындарыңыз менен чогуу ден соолукта, бактылуу жана бейпил жашоо сүрүүңүздү каалайм.

Кыргыз өлкөсүндө 28-ноябрда өткөрүлгөн шайлоолор тынч жана бейпил атмосферада жыйынтыкталгандыгы үчүн сизди жана кыргыз элин чын жүрөктөн дагы бир жолу куттуктап, шайлоонун жыйынтыгы дос жана бир тууган Кыргыз эли үчүн ийгиликтүү болуусун тилейм.
Тарыхый жана маданий байланыштарыбыз бекем болгон стратегиялык өнөктөшүбүз Кыргыз мамлекети менен эки тараптуу мамилелерибизди коопсуздук, туруктуулук жана бакубатчылыкка салым кошо тургандай негизде уланта беребиз”, - деп айтылат куттуктоо телеграммасында.

Түркия лидери ошондой эле Садыр Жапаровго бекем ден соолук, бакыт-таалай, ал эми дос жана бир тууган Кыргыз элине бакубатчылык жана аманчылык каалаган.