COVID-19га каршы эмдөө сертификаттарын сатуу боюнча кызматтык иликтөө жүргүзүлөт

Саламаттыкты сактоо министрлиги COVID-19га каршы эмдөө сертификаттарын сатуу боюнча жарыяланган фактылар боюнча кызматтык иликтөө жүргүзөт. Бул туурасында аталган министрликтин маалымат кызматынан бүгүн, 7-декабрда билдиришти.

Министр Алымкадыр Бейшеналиев коронавирустук инфекцияга каршы эмдөө кампаниясынын жүрүшү боюнча бардык жооптуу адистердин катышуусунда чукул жыйын өткөрүп, анда эмдөө тууралуу сертификаттардын сатылуусу боюнча маселени көтөрүлдү.

Жыйында министр комиссия түзүп, кыска мөөнөттө кызматтык иликтөө жүргүзүүнү тапшырды. Кызматтык иликтөөнүн жыйынтыгында күнөөлүүлөргө кызматтан бошотууга чейинки тартиптик жаза чаралары көрүлүп, андан соң иш материалдары юридикалык баа берүү үчүн укук коргоо органдарына өткөрүп берилет.

Ошондой эле Бейшеналиев республиканын саламаттыкты сактоо уюмдарынын жетекчилери коронавирустук инфекцияга каршы эмдөө кампаниясын талаптагыдай өткөрүү үчүн жеке жоопкерчиликтүү экенин белгилеп, эмдөөнүн жүрүшүнө көзөмөлдү күчөтүүнү тапшырды.

"Өлкө жетекчилиги, Саламаттыкты сактоо министрлиги вакциналардын калкка жеткиликтүү болушун камсыз кылуу, жарандарыбыздын эмдөөдөн өтүшү жана COVID-19дан каза болгондордун санын азайтуу боюнча чоң иштерди жасап жатат. Мындай көрүнүштөр калктын эмдөө кампаниясына болгон ишенимин кетирүүдө. Андыктан эгер күнөөсү далилденсе, бардык күнөөлүүлөр тиешелүү жазасын алышы керек", - деди Алымкадыр Бейшеналиев.