Сокулукта 16 жаштагы кыздын зордукталышы: Айылдын жашоочулары шектүүнүн үй-бүлөсүнүн көчүп кетишин талап кылышты

Сокулуктагы 16 жаштагы кыздын зордукталышы боюнча Кызыл-Туу айылынын эли шектүүнүн үй-бүлөсүн айылдан көчүп кетишин талап кылып, эки күн убакыт беришти.

"Жалпы айылдын тургундары, өзгөчө жаштар ушул талапты коюп жатат. Болбосо кызуу кандуулукка алдырып жиберишибиз мүмкүн. Мыйзамдуу өлкөдө жашап жаткандан кийин ушул нерсеге жол бербей, аксакалдарды чакырдык. Алардын үйүн өрттөп, айылдан кууп чыксак деле болмок. Бирок мыйзам бар экен, бизди чоңдорубуз токтотту. Бирок бул үй-бүлө эки күндүн ичинде айылдан кетпесе, өзүбүз чара көрөбүз. Ушунча жылдан бери унчукпай келе жатабыз. Бул үй-бүлө биринчи жолу кылмышка шектелип жаткан жок, буга чейин айылда мал уурулук болуп келген", - деди аталган айылдын тургуну.

Ал эми Сокулук районунун акими Курбанбек Айтибаев бул иш мыйзам чегинде катуу караларын, күнөөлүү адам эң катаал жазага тартылышы керектигин билдирди.

Буга чейин Чүй облусунун Сокулук районунда 17 жаштагы кызга кол көтөрүп, зордуктоого шектүү жаран кармалган.

Белгилүү болгондой, кыздын атасы Сокулук РИИБине арыз менен кайрылган. Анда арыз ээси 5-декабрь күнү эртең менен 2004-жылы туулган кызын белгисиз бирөө Бишкек шаарына жумушка жеткирип коюуну убада кылып, жолдон күч колдонуп зордуктап салганын билдирген. Бул факты Кылмыштардын жана жоруктардын бирдиктүү реестрине 154-берене ("зордуктоо") боюнча катталып, сотко чейинки өндүрүш иши башталган.