Ымыркайы менен Ак Үйдүн алдына митингге чыккан келиндин күйөөсү: "Актангым келбей калды"

Кечээ, 6-декабрда Ак Үйдүн алдында ымыркайы менен Нурила Төрөканова митингге чыккан. Анда ал 2018-жылы Руслан Жураев аттуу адамга жарандык нике менен экинчи жубайы болуп турмушка чыгып, 2 бала төрөгөндүгүн билдирген. Биринчиси уул болгондуктан аны жолдошу бербей жатканын айткан.

Мындан улам анын жарандык никедеги жолдошу Руслан Жураев менен байланыштык. Ал редакцияга Нурила Төрөканова жазган делген түшүнүк катты жөнөттү. Катта “Өз колум менен баланы асырап алууга бердим" деп жазылган.

"Бул катты ал өзү жазып берген. Чарчадым, актангым деле келбей калды", - деди Руслан Жураев.

Бирок Нурила Төрөканова бул тил катты жазбаганын айтууда.

Нурила Төрөканова уулу төрөлө электе эле ажырашып, өзүнчө калгандыгын жана төрөт үйүнөн баланы өз атына каттатып алып чыккандыгын айтып күбөлүгүн көрсөттү. Эркек бала төрөлгөндөн кийин аны алыш үчүн Руслан Жураев көптөгөн аракеттерди кылып, ар кандай амалдар менен баланы тартып алгандыгын айтты.

“Менин колумда мага кылган мыйзамсыз иштерин жана кордуктарын далилдеген бир топ документтер бар. Бирок укук коргоо органдары коррупциянын айынан акыйкат иш кылбастан, мени тескерисинче “баласын сатты” деп айыпташты. Ал кош бойлуу кезимде “аман-эсен төрөп ал, менин баламды этият бак, баламдын сүрөттөрүн жөнөтүп кой” деп айтып, "тынчыңды бузбайм, мен барганда баланы көрсөтүп турсаң” деп тил кат жазып берген", - деди Нурила Төрөканова.

Буга чейин Ош шаарында көп кабаттуу үйдөн секирип, жанымды кыям деген 34 жаштагы келинди ӨКМнын куткаруучулары сактап калышкан. Кийинчерээк ал бул жолго эмне себептен барганын айтып берген.