Бишкекти аралаган жылкылар кармалды. Мэрия малдын ээси белгисиз болуп жатканын айтат

Бишкек шаардык мэриясынан борбор калааны аралап жүргөн жылкылар кармалганын, мал ээсине айып пул салынарын кабарлашты.

Белгилүү болгондой, "Шаардык эс алуу бактары" муниципалдык ишканасынын жумушчулары жана милиция кызматкерлери Дайыр Асанов атындагы сейил бактан 15 жылкыны кармашты.

"Учурда жылкылар "Шаардык эс алуу бактары" муниципалдык ишканасынын ат сарайында кармалууда. Санитардык-экологиялык инспекциянын кызматкерлери жашыл аянттарга зыян келтирүү боюнча акт түзүү үчүн мал ээсин күтүүдө. Алдыда актынын негизинде мыйзам бузуу боюнча протокол түзүлөт", - деп айтылат билдирүүдө.

Буга чейин социалдык тармактарга жылкылар түн ичинде шаардагы көчөлөргө чейин чыгып, көп кабаттуу үйлөрдү аралап жүргөн видеосу тараган. Ээси белгисиз жылкылар Бишкектеги Асанбай, 11-кичи райондорун аралап кеткени окурмандар тарабынан айтылган.