Сокулуктагы 17 жаштагы кыздын зордукталышы: Шектүүнүн үй-бүлөсү Бишкекке көчүп келди. "Эптеп бир жерге жайгаштык. Эмне кылаарыбызды билбей жатабыз" дейт тууганы

Сокулук районундагы 17 жаштагы кызды зордуктаганга шектүү кишинин үй-бүлөсү Бишкекке көчүп келди. Бул тууралуу SUPER.KG порталына шектүүнүн жакын тууганы билдирди.

"Бишкектеги туугандарыбыздын бириникине эптеп жайгаштык. Бул деле убактылуу да. Үй-бүлөдө жалпы 8 киши. Эки балабыз мектепке барат. Алардын окуусу калды. Эмне кылаарыбызды билбей калдык", - деди шектүүнүн тууганы.

Буга чейин шектүүнүн туугандары айылдан көчүп кеткенин SUPER.KG порталына айыл тургундарынын бири билдирген.

7-декабрда айыл эли зордуктоого шектүү жарандын үй-бүлөсүнө 2 күн убакыт берип, айылдан көчүп кетүүсүн талап кылышкан.

Буга чейин Чүй облусунун Сокулук районунда 17 жаштагы кызга кол көтөрүп, зордуктоого шектүү жаран кармалган.

Белгилүү болгондой, кыздын атасы Сокулук РИИБине арыз менен кайрылган. Анда арыз ээси 5-декабрь күнү эртең менен 2004-жылы туулган кызын белгисиз бирөө Бишкек шаарына жумушка жеткирип коюуну убада кылып, жолдон күч колдонуп зордуктап салганын билдирген. Бул факты Кылмыштардын жана жоруктардын бирдиктүү реестрине 154-берене ("зордуктоо") боюнча катталып, сотко чейинки өндүрүш иши башталган.