Алматыда Кыргыз өлкөсүнөн барган мугалим эл аралык олимпиадада I орунду ээледи

Кыргызстандык мугалим машыктыруучулар арасындагы эл аралык олимпиадада I орунду ээледи. Бул тууралуу Билим берүү министрлигинин басма сөз кызматынан билдиришти.

Ушул жылдын 4-5-декабрында Алматы шаарында математика, физика жана информатика мугалимдеринин VIII эл аралык конкурсу болуп өткөн.

Бул олимпиадага 220дан ашуун математика мугалими, 70тен ашуун физика мугалими, 50дөн ашуун информатика мугалими катышты. «Газпром Кыргызстан» мектебинин мугалими Медер Осмонов да аталган олимпиадага катышып, бардык маселелерди чечип, I орунду ээледи.

Кыргыз өлкөсүнөн олимпиадага математика боюнча калыстар тобунун мүчөсү катарында «Газпром Кыргызстан» мектебинин математика мугалими Мамат Ишматов да чакырылган.

Ал бул олимпиадага 2019-жылы катышып, 108 катышуучунун арасынан математика боюнча I орунду багындырган.