Бишкектин Ленин районунда коронавируска каршы дагы 2 эмдөө пункту ачылды

Бишкектин Ленин районунда коронавирус илдетине каршы эмдөө жүргүзө турган дагы эки мобилдик пункт ачылды. Бул тууралуу мэриянын басма сөз кызматынан билдиришти.

Маалыматка ылайык, эмдөө пунктунун биринчиси "Ала-Арча" соода борборунда жайгашкан (Чыңгыз Айтматов проспектиси, 299в дареги, 2-кабат), саат 10:00дөн 20:00гө чейин иштейт. Экинчиси "Кенч" соода борборунда ("Ош базары" соода комплекси, 3-кабат) ачылган. Иш убактысы саат 10:00дөн 17:00гө чейин.

Ленин районундагы башка эмдөөчү жайлар төмөнкү даректерде жайгашкан:

• № 1 бириктирилген үй-бүлөлүк борбору;
• № 2, 11, 12, 13 жана 17 үй-бүлөлүк борборлору;
• Темир жолчулардын бейтапканасында;
• "Азия Молл" соода борборунда.

Ошондой эле мэрия эмдөөдөн өтүүнү каалаган жарандарды жанына өздүгүн тактаган документин ала барууну эскертет.