Дээрлик 6 миллион сомго жакын. Бишкекте Жаңы жылдык балатыны жасалгалоого сарпталган каражат боюнча мэриянын түшүндүрмөсү

"Ала-Тоо" аянтындагы Жаңы жылдык балатыны жасалгалоого "Бишкек жарык" ишканасы 5 миллион 687 миң 500 сомдук тендер өткөргөн. Бул сумма коомчулукта талкууга алынганына байланыштуу Бишкек шаардык мэриясы түшүндүрмө берет.

Калаа башкармалыгы бул суммага 25 метрлик балатыны гана эмес, "Ала-Тоо" аянтын жасалгалоого кеткен чыгымдар да кирерин маалымдайт.

"Балатыны, аянтты кооздоого 30дан ашуун муниципалдык кызматтын жумушчулары, бир канча техника тартылды. Жаңы жылга карата жасалгалоо иштери борбордук көчөлөрдө да жүргүзүлөт. Аллеялар, аянттагы ар кандай объектилери гирляндалар менен оролуп, көчөлөрдөгү бактарга чоң көлөмдөгү оюнчуктар илинди.

Мэрия былтыркы жылы сатып алып, бирок артып калган декоративдик каражаттар көйгөй жаратат", - дешет мекемеден.

Ошондой эле калаа башкармалыгы Жаңы жылдык балатыны кооздоо боюнча маселеге жарандардын жана блогерлердин кайдыгер карабай реакция кылып жатканына кубанычта экенин, аларды Жаңы жылга карата даярдык көрүү боюнча шаардык штабдын жыйындарына катышууга чакырат.