Оштогу оорукананын жетекчиси Жапаровго шыпыргылар боюнча жооп берди

Кечээ, 15-декабрда мамлекеттик сатып алуулар боюнча мыйзам долбоорунун коомдук талкуулоосунда министрлер кабинетинин төрагасы Акылбек Жапаров мамлекеттик сатып алуулар боюнча мыйзамда коррупциялык тобоелдиктер бар экенин айтып, Мамлекеттик сатып алуулар порталында 2021-жылдын башынан бери ооруканалардын бири 6800 шыпыргы сатып алганына токтолгон.

Министрлер кабинетинин төрагасы күмөн жараткан 7 миң шыпыргы Кара-Суу районундагы ооруканага муктаждык боюнча сатып алынган. Бул тууралуу аталган оорукананын жетекчиси Гүлкайыр Муратованын билдирүүсүндө айтылат.

Оорукана жетекчисинин кайрылуусу Саламаттыкты сактоо министрлигинин Фейсбуктагы баракчасына жайгаштырылды.

Анда министрлер кабинетинин жетекчиси мамлекеттик сатып алуулар боюнча мыйзам долбоорунун коомдук талкуулоосу учурунда аталган оорукана тууралуу айтканы, бирок ал буюмдар оорукананын зарыл болгон муктаждык менен сатылып алынганы айтылат.

“Эгер сатылып алынган 6800 шыпыргыны, бул ооруканынын карамагындагы 107 медициналык түзүмдөргө бөлсөк айына 5-6дан гана шыпыргы тиет. Мындан азайтууга болбойт”, - деген Муратова.

Ошондой эле маалыматта Финансы министрлиги аталган ооруканада текшерүүлөрдү жүргүзгөнүн, керектүү документтердин баары оорукана тарабынан көрсөтүлгөнү айтылат.