Бишкек мэриясы Казакстандан автобустарды сатып алууну көздөп жатат

Бишкек шаарынын мэри Айбек Жунушалиев Казакстандын соода жана интеграция министри Бакыт Султанов баштаган делегация менен жолугушту. Бул тууралуу мэриянын басма сөз кызматынан билдиришти.

Маалыматка ылайык, жолугушууда тараптар муниципалитеттин башчысы Нур-Султан шаарына болгон жумушчу сапарынын алкагында кол койгон меморандумдун алкагында Бишкек мэриясы тарабынан газ менен жүрүүчү автобустарды алуу боюнча мүмкүн болгон инвестициялык келишимдин шарттарын талкуулашты.

Айбек Жунушалиев белгилегендей, кыймылдуу курамды көбөйтүү маселеси шаардык транспорт кызматтарынын күн тартибинде турат. Ал жеткирүүчүлөрдү анын иштешине баа берүү үчүн сыноо автобусун жөнөтүүгө чакырды. "Автобустар шаардыктардын жана жүргүнчүлөрдүн сын-пикирлерин жана каалоолорун эске алуу менен сатып алынат", - деп белгилешти мэриядан.