Түндүк Кореяда 11 күндүк аза күтүү күндөрүндө жарандарга күлүүгө, туулган күн тосууга тыюу салынды

Түндүк Кореяда өлкөнүн мурдагы лидери Ким Чен Ирдин каза болгондугунун 10 жылдыгына байланыштуу жарандарга күлүүгө, туулган күн тосууга, ичимдик ичүүгө тыюу салынды. Бул тууралуу чет элдик маалымат каражаттары жазып чыгышты.

Андагы маалыматка караганда, бийлик өкүлдөрү 11 күндүк аза күтүү маалында жарандарга бир катар чектөөлөрдү киргизген. Бул күндөрү ичимдик ичип, катуу күлүп же соода кылганга болбойт. Айрым маалыматтарга караганда, былтыр аза күтүү маалында мас абалындагы бир канча адамды укук коргоо органдарынын өкүлдөрү кармап кетишкен, андан соң аларды эч ким көргөн эмес.

"Керек болсо, аза күтүү күндөрүндө кокус үй-бүлө мүчөлөрүнөн бири каза болсо катуу ыйлоого жана аны акыркы сапарга узатууга тыюу салынат. Аза күтүү күндөрү аяктаган соң гана маркумду жерге берүүгө уруксат берилет. Ошондой эле бул күндөрү туулган күн белгилөөгө болбойт", - деп билдирген булактардын бири.

Белгилей кетсек, Ким Чен Ир 2011-жылы 17-декабрда каза болгон. Маалыматтарда анын жүрөк оорусу кармап каза болгондугу айтылат. Ал Түндүк Кореяны 1994-жылы мурдагы лидер, атасы Ким Ир Сен каза болгондон кийин 2011-жылга чейин башкарган. Андан соң өлкөнү башкаруу анын уулу, учурдагы лидер Ким Чен Ынга өткөн.