"Эми мен эркин жашагым келет". 8 жылдан бери сойку болуп жүргөн кыз анын кесепетин айтып берди

SUPER.KG порталына 23 жаштагы кыз кайрылып, кантип сойкуга айлангандыгы тууралуу айтып берди.

"Биз беш бир тууганбыз. Атам эрте каза болуп калган. Апам оорукчан эле. Жашоо шартыбыз начар болгондуктан 2014-жылы Ысык-Көлдөн Кант шаарына келип окуй турган болдум. Бирок ал жерден бир кыз менен телефон аркылуу таанышып, окубай эле Бишкекке иштегени кеттим. Ал кыз экөөбүз Бишкектен Г.Ш. аттуу аял менен тааныштык. Бир күнү кыз мени кафеге ээрчитип барды. Ал жерден жашы 30дар чамасындагы эркек киши менен таанышып, спирт ичимдигин ичтик. Мен ошондо алгачкы жолу спирт ичимдигин оозума алдым. Мас болуп калган экенмин. Тиги киши мени бир жерге алып барып зордуктаган экен. Мен кыздык белгимден ажырагандан кийин баягы таанышкан аялга ыйлап бардым.

Ал 3-4 күн ойлонду дагы "сага акча керек, ден соолугуңду калыбына келтир" деди. Бир эркек менен 5 мүнөткө жолуктурду. Андан кийин ал киши мага тийбесе деле зордуктады деп арыз жаздык. Ал 1 жылга соттолуп кетти. Ошодон көп узабай дагы эки кишини кылтакка илдик. Ал экөө кесилген жок, бирок акча төлөп чыгышты. Акчасына мени бир сыйра кийинтти. Калганын көргөн жокмун. Кайра Г.Ш. биринчи камалган жигитти чыгаруу үчүн адвокат жалдады. Анан чыгымдарды менин башыма үйүп койду. Анткени баарына мени күнөөлөдү.

Мени шаарга чакырган кыз экөөбүз кийинчерээк Москва жана Правда көчөлөрүнүн кесилишинде туруп калдык. Көрсө, ал жерде денесин саткан кыздар иштешет экен. Биз билген эмеспиз. Кийин акча таппай калганда аялдын кеңеши менен ошол жерде туруп 2-3 күн иштедик. Андан соң чакыруу менен чыгып иштей баштадык. Тапкан акчабыздын баарын Г.Ш.га берчүбүз. Анткени тиги кызды да карыздар кылып койгон.

Бир күндө 4-5 миң сом берчүбүз. Болбосо үбөлүк менен сабачу. Мени качып кетпесин деп айылдагы апамды чакыртып, күрөөгө коюп алган. Азыр да апам ошонун колунда. Мени коркутуп, оорукчан бир тууганыңдын органдарын сатам дегем. Апам сойку болуп иштээримди билбейт. Ага кафеде официант болуп иштейм деп койгом. Менин билимим жана паспортум жок. 8 жылдан бери анын айткандарын жасап келдим. Тажаганда үйдөн качып кеттим. Бир адамдын кеңеши менен жактоочуга жолугуп, ага болгон арманымды айтып бердим. Биз Г.Ш.нын үстүнөн арыз жаздык. Мен эркин жашагым келет", - дейт ал.