Садыр Жапаровдун демилгеси боюнча БУУнун башкы ассамблеясы Нью-Йоркто 2022-жылды - Тоолорду туруктуу өнүктүрүү эл аралык жылы деп жарыялады

Президент Садыр Жапаровдун демилгеси боюнча БУУнун башкы ассамблеясы Нью-Йоркто 2022-жылды - Тоолорду туруктуу өнүктүрүү эл аралык жылы деп жарыялады. Бул тууралуу президенттин администрациянын басма сөз кызматынан билдиришти.

Кыргыз Республикасынын демилгеси боюнча жана 93 мүчө-мамлекеттин тең авторлоштугунда 2021-жылдын 16-декабрында Бириккен улуттар уюмунун башкы ассамблеясы тийиштүү резолюцияны бир добуштан жактырып, 2022-жылды “Тоолорду туруктуу өнүктүрүү эл аралык жылы” деп жарыялады.

Кабыл алынган документ мүчө-мамлекеттерге, БУУ тутумунун уюмдарына, башка эл аралык уюмдарга жана кызыкдар тараптарга, анын ичинде жарандык коомчулукка, жеке секторго жана илимий-билим берүү чөйрөлөрүнө тоолорду туруктуу өнүктүрүүнүн жана тоо экосистемаларын сактоонун жана туруктуу пайдалануунун маанилүүлүгү жөнүндө маалымдуулукту жогорулатуу максатында Эл аралык жылды жетиштүү түрдө белгилөөнү сунуштайт.

Эске салсак, резолюция биринчи жолу дүйнөлүк коомчулукка Садыр Жапаровдун ушул жылдын сентябрындагы БУУнун Башкы Ассамблеясынын жалпы дебаттарындагы сөзүндө айтылган.

Резолюция Эл аралык тоолор жылынын 20 жылдыгына жана 2002-жылы Бишкек тоо декларациясын кабыл алган Биринчи Глобалдык тоо саммитине карата жылдырылган.