"Балдарым чоң атасыз өсүп жатат". Эдил Байсалов Сеид Атамбаевдин билдирүүсүнө жооп кайтарды

Кечээ Сеид Атамбаев социалдык тармактагы баракчасына балдарынын сүрөтүн жүктөп, "Менин дагы балдарым чоң атасыз өсүп жатат. Демек, анын мээрими, камкордугу жок чоңоюп жатышат. Чындыгында сагынышат" деген билдирүү жазып калтырган.

Ага жооп катары министрлер кабинетинин төрагасынын орун басары Эдил Байсалов социалдык тармактагы баракчасына төмөнкүдөй билдирүү калтырган.

"Кой-Таш окуясында каза болгон полковник Үсөнбек Ниязбековдун 6 баласы кандай сагынып жатат? Урматтуу депутат Сеид Атамбаев, балдарыңызга чоң атасы эмне үчүн абакта отурганын жана офицерди атуу чоң кылмыш экенин түшүндүрүшүңүз керек", - деп жазып калтырган Байсалов.

Белгилей кетсек, 2019-жылдын 7-августунда Кой-Ташта Атамбаевди кармоо боюнча атайын операция учурунда УКМКнын ”Альфа” атайын бөлүгүнүн командиринин орун басары Үсөнбек Ниязбековго ок тийип жарадар болгон. Ага чукул операция жасалганына карабай, алган жаракатынан улам каза болгон.

47 жаштагы аскер кызматкеринин артында 6 баласы калган.