"Мени улуу Орусия коргойт дегем". Аскар Акаевдин "Кумтөр" боюнча сурактан кийинки маеги

Кыргыз Республикасынын мурдагы президенти Аскар Акаев Орусиянын "Московский комсомолец" басылмасына маек берди. Анда туңгуч президент 16 жылга созулган сүргүн бүткөнүн, ага тагылып жаткан бардык айыптар алып салынганын, буга кантип жеткенин жана келечекте кандай пландары бар экенин баяндады.

"2021-жылы мен эки жолу мекениме бардым. Ал жакта күн сайын эртеден кечке чейин укук коргоо органдары менен абдан тыгыз иштештим. Азыр Кыргыз өлкөсү тарабынан мага карата эч кандай дооматтар жок, бардык иштер жабылды деп айта алам. Эми мен Кыргыз мамлекетинин башка жарандары сыяктуу эле каалаган убакта келе алам.

Албетте, буга азыркы президент Садыр Жапаровдун салымы чоң. Ал өзү мага телефон чалып, 16 жылдан бери Кыргыз өлкөсүндө мага карата көптөгөн иштер чогулганын, алардын көбү мурдагы иш экенин, бирок аларды жабуу үчүн менин түшүндүрмөлөрүм, жоопторум керектигин айтты. Бишкекке учуп келүү чакырыгын ыраазычылык менен кабыл алдым. Андан сырткары УКМКнын башчысы Камчыбек Ташиевге ыраазымын. Ал жана анын бардык кол алдындагылары мага абдан жакшы мамиле кылышты. Алар мыйзамга ылайык иш кылышса да, абдан боорукер болушту", - дейт ал.

Кыргыз жергесине биринчи жолу барарда кооптонуу болбогонун, анткени анын сапары боюнча маселе Владимир Путин менен Садыр Жапаровдун деңгээлинде макулдашылганын айтат. Жапаров чалгандан 2 күндөн кийин эле (бул убакыт Орусия бийлигине кабарлама берүүгө сарпталды) ал Кыргыз жергесине келгенин белгилейт. "Жапаров телефон чалганда үйгө кайтып бара аларымды түшүндүм. Мурунку президенттердин тушунда Кыргыз мамлекетинин укук коргоо органдарынан бешинчи, онунчу прокурорлор мага кайрылышкан. Алар мен издөөдө жүргөндөрдүн тизмесинде экенимди, узак мөөнөткө эркимен ажыратылышымды айтып коркутушкан. Мен алардын бардык сөздөрүнө көңүл бурбай, "мени улуу Орусия коргойт" дегем. Бирок кийин мени президент өзү чакырганда сөздү желге ыргыткан жокмун. Мен Владимир Владимировичке Орусияда мага ушунчалык меймандос мамиле кылганы үчүн чексиз ыраазымын. Бул жерде иштегениме 16 жыл болду, менин үй-бүлөм үчүн эң ыңгайлуу шарттар түзүлгөн".

Акаев "Кумтөр" маселеси боюнча күбө катары да, айыпталуучу катары да суракка чакыртылганын белгиледи.

"Мага берилген суроолордун көбү ушул конкреттүү ишке байланыштуу. Биринчи алтын 1997-жылы берилген. Бирок 2000-жылдын башында кыянаттык менен пайдалануу башталып, экологияга чоң зыян келтирип, айрым чиновниктерибиз коррупцияга аралашты. Ишке зыян келтирбеш үчүн башка жагдайларды айта албайм. Бирок мен өзүмө тиешелүү суроолордун баарына жооп берип, тергөөчүлөргө эл аралык соттордо жардам бере турган бардык керектүү маалыматтарды берүүгө аракет кылдым", - деди маегинде.

Ал эми Кыргыз өлкөсүнө кайтуу тууралуу жакынкы аралыкка пландары жок экенин, Орусияда анын кызыктуу жумушу бар экенин кошумчалады.

Белгилей кетсек, Аскар Акаев УКМК менен болгон сүйлөшүүлөрүнүн негизинде 2-августта Бишкекке келип, ошол эле күнү сурак берген.

Ошондой эле "Кумтөр" иши боюнча кол коюлган документтер боюнча видео кайрылуу жасап кечирим сураган. 8-августта Аскар Акаев Бишкек-Москва багыты боюнча учуп кеткен.

Ал өлкөгө экинчи жолу 14-декабрда келип, "Кумтөр" иши боюнча суракта кызматтык абалынан кыянаттык менен пайдаланбаганы далилденип, Москвага 19-декабрда учкан.