"Кара-Кечеде" айдоочулар менен күзөттөгү аскерлердин ортосунда чыккан чыр жөнгө салынды

"Кара-Кече" көмүр филиалынан көмүр алуу кезегин күтүп жаткан айдоочулар менен кенди кайтарган "Альфа" бөлүмүнүн аскерлеринин ортосунда чыккан чыр жөнгө салынды. Бул тууралуу УКМКнын маалымат кызматынан билдиришти.

Маалыматка ылайык, 22-декабрда жергиликтүү бийлик жана күч органдары тарабынан айдоочуларга түшүндүрүү иштерин жүргүзүү учурунда айдоочулар атайын кызматтын кызматкерлеринин коопсуздукту сактоо ишин улантышын суранышты.

Учурда абал туруктуу, "Кара-Кече" көмүр филиалынан көмүр алуу иштери жүрүүдө. Азыркы тапта бул иш боюнча укук коргоо органдары жеринде иштеп жатат.

Буга чейин "Кара-Кечеде" көмүр ташыган айдоочулар менен кенди кайтарган "Альфа" бөлүмүнүн аскерлеринин ортосунда чыр чыкканы боюнча видеосу интернетке тараган.