Президент: "Бюджетти жакшы көтөрүп алсак, апрелден баштап баарынын айлыктары дагы көтөрүлөт"

Бүгүн, 25-декабрда президент Садыр Жапаровдун катышуусунда министрлер кабинетинин жыйналышы өтүп жатат. Анда президент сөз сүйлөдү.

"Саламаттыкты сактоо, маданият системасынын кызматкерлеринин эмгек акысы категориясына жараша 50 пайызга чейин жогорулатылды. Өткөн жылдагы Баткен окуяларынан кийин мамлекеттин коргоо жөндөмдүүлүгүн күчтөндүрүү зарылдыгы ачыкталды. Кыргыз мамлекетинин 30 жылдык тарыхында биринчи жолу өзүбүздүн каражатыбызга ок өтпөс унаалар, тик учактар, пилотсуз учактарды жана башка аскер техникаларын сатып алдык. Булар менен бирге бир катар күч түзүмдөрүнүн кызматкерлеринин айлыктарын жогорулаттык. Мисалы, улук офицерлер мурда 25 миң сомдун тегерегинде айлык алса, эми алар 37-40 миңдин тегерегинде алып калышты. Буюрса, бюджетти жакшы көтөрүп алсак, апрель айынан баштап баарынын айлыктары дагы көтөрүлөт", - дейт ал.