Нуржигит Кадырбеков Камчыбек Ташиевдин "Кадырбеков унду желкесине көтөрүп келеби?" деген сөзүнө жооп берди

Бүгүн, 7-январда Жогорку Кеңештин депутаттары Казакстанга кыргыз аскерлерин жөнөтүү маселесин карап жатат.

Жыйында депутат Нуржигит Кадырбеков депутаттар чечим кабыл ала турган болсо, Конституцияга ылайык келбей тургандыгын айткан.

Буга УКМК башчысы Камчыбек Ташиев чек арадагы посттор жабылып жатканын, бардыгы жабылса ундун, күйүүчү майдын баасы кымбаттаарын айткан.

"Азыр 7 посттун төртөө жабылды. Эртең бардыгы жабылса, унду Кадырбеков желкесине ташып келип береби?", - деген Камчыбек Ташиев.

Жыйында Нуржигит Кадырбеков бул боюнча пикирин айтты. Депутаттын айтымында, Кыргыз өлкөсү кыйын абалга келген учурда Казакстан дагы чек арасын жапкан.

"Камчыбек Кыдыршаевич, абдан маанилүү маалымат бердиңиз, чек аралардын жабылышы боюнча. Эми өткөн күнгө кайрылбайын дедим эле, Казакстан мындан дагы кыйын учурда чек арасын жапкан. Бизге ошол учурда ун керек болчу, азыр Кудайга шүгүр, өзүбүздү-өзүбүз бага алабыз. Чек араны жапканда деле биз жашап кеткенбиз.

Биз аскерлерди жөнөтсөк, Казакстан чек арасын ачат деген кепилдик барбы? Биз өз пикирибизди айтсак, пиар же саясий упай деп жатасыз. Жан дүйнөбүзгө, жүрөгүбүзгө кирип чыкпагандан кийин мындай пикир туура эмес. Мен сизди сыйлайм, өзүңүздүн ишиңизди аткарып жатасыз. Бирок биз дагы пикирибизди айталы. Аша чаап кетсем бардыгыңыздардан кечирим сурайм", - деди Нуржигит Кадырбеков.

Буга Камчыбек Ташиев жооп берди.

“Урматтуу Нуржигит Кадырбекович, кечирип коюңуз. Сиз биринчи жолу депутат болуп келдиңиз. Мен сизден айырмаланып, тажрыйбалуу саясатчы катары ким эмнени айтып жатканын жакшы билем", - деп жооп берди Камчыбек Ташиев.