Кайрат Примбердиев: "Викрам Рузахунов митинг үчүн Казакстанга барышы мүмкүн эмес"

Бишкекте Казакстандын Кыргыз өлкөсүндөгү элчилигинин алдында митинг өтүп жатат. Митингге өнөр өкүлдөрү, активисттер дагы катышууда.

Кыргыз Республикасынын Эмгек сиңирген артисти Кайрат Примбердиев нааразычылык акциясына кесиптеши, музыкант Викрам Рузахуновду колдоо үчүн келгенин айтты.

"Мекендешибиз, жаз музыканты Викрам Рузахуновду колдоо үчүн келдик. Анын жакындары дагы видеодогу Викрам экендигин айтып жатышат. Ал террордук акт, мародёрлукка шектелип жатат. Аны билген адам катары буга каршыбыз. Анткени Викрам өлкөдөгү белгилүү жаз музыканты. Ал митинг үчүн Казакстанга барышы мүмкүн эмес. Видеодо дагы байкалып турат, атайын даярдалган тексти окуганы. Мен буга чейин деле жарандык пикиримди билдирип, ар кандай митингдерге катышкам. Бирок Викрам бир дагы жолу митингге катышкан эмес. Анан башка өлкөгө митингге катышам деп барганына акылыбыз жетпей турат.

Тийиштүү кызматтар бул маселени тез арада туура жана мыйзам чегинде чечип, мекендешибизди өлкөгө кайтарса", - деди Примбердиев.

Маалымат үчүн:

Буга чейин Казакстандагы телеканалдардын биринде баш аламандыкка катышкандардын бири Кыргыз өлкөсүнөн учуп баргандыгын айткан видео көрсөтүлгөн. Андан соң интернет колдонуучулары видеодогу жаран жаз музыканты Викрам Рузахунов экендигин жазышкан.

Бул боюнча Тышкы иштер министрлиги жана ИИМ аталган жарандын кармалышы боюнча жагдайларын тактоого тиешелүү чаралар жүргүзүлүп жатканын билдиришти.