Дарак кыйылды. Ырчы Анжелика жол кырсыгына кабылган күндү эстеп, окуя болгон жерде куран окутту

Ырчы Анжелика былтыр кыздары, курбусу менен жол кырсыгына кабылган. Тагыраагы, алар 23-январда Караколго бара жатканда унаа тайгаланып, бир тарабы жолдун четиндеги бакка урунган. Бүгүн, 22-январда дал ошол бак жергиликтүү тургундардын, элдин колдоосу менен кыйылды. Бул туурасында ырчы тарабынан белгилүү болду.

"Былтыр ушул күнү бакты кыйып койгондо таңкы саат беште унаа менен түз талаа жакка өтүп кетет белек?

Жол эреже белгилерин түндө көрүнө тургандай кылып жасап, камераларды иштетип, дарыгерлерге барып ыраазычылык билдирип, кан чыгарып, ушул жерден курман болгондордун баарына куран окуттук.
Ар бир башыбызга түшкөн сыноо - жөн жерден келбейт. Аткара турган миссияларды жасап, тирүүлүктө пайдалуу иштерге себепкер болууга мүмкүнчүлүк түзүүгө аман калат экенбиз.

Бул бакты кыюуга уруксат алганбыз, жалпы эл колдоду. Даракты кыйып жатканда айдоочулар унааларын токтотуп "рахмат" деп жатышты. Бүгүн кечинде дарыгерлер кафеге чакырылган", - дейт ырчы.

Жол кырсыгынын чоо-жайы:

Ырчы Анжелика өткөн жылы 23-январда жол кырсыгына кабылып, анын кесепетинен өзү жана 5 жаштагы кызы жаракат алганы маалымдалган. Ысык-Көл облусунун Түп райондук ооруканасынан кырсык тууралуу маалымат беришкен. 24-январда ырчыга шашылыш операция жасалып, 25-январда 5 жаштагы кызына операция жасалган.

Кийинчерээк, ырчынын улуу кызы Айымага да операция жасалары күтүлүп жатканы белгилүү болгон. Академик Сабырбек Жумабеков Анжелика балдак менен басып баштаганын, ал эми анын улуу кызы Айыманын моюн омурткасына операция жасалганын, абалы канааттандырарлык экенин билдирген.

10-февралда ырчы кызы экөө ооруканадан үйүнө чыгарылган. Андан кийин Анжелика айым кызы менен ден соолугун калыбына келтирүү процесстеринен өтүп, Түркиядан медициналык кароодон өтүшкөн.