Жалал-Абаддагы эркек акушер-гинекологду "иштен кет" деген окуя: Иш өндүрүштөн кыскартылды

Жалал-Абад облусунун Кара-Көл шаарында эмгектенген акушер-гинеколог айрым тургундар тарабынан эскертүү алган. Тагыраагы, эркектер топтолуп, жалпы дарыгерлик практика борборунун эркек акушер-гинекологуна жумуштан кетүү талабын коюшкан. Бул окуядан кийин милиция кызматкерлери териштирүү иштерин баштаган.

"Аталган окуя боюнча иш өндүрүштөн кыскартылды. Арыз ээси кайра тосмо арыз жазып, тараптар келишти. Дарыгер ишин улантууда", - дешти Жалал-Абад ОИИБинин маалымат кызматынан.

Белгилей кетсек, 17-январда айрым эркектер топтолуп, адиске жумуштан кет деген талап коюшкан. Мындан улам 27 жаштагы адис арыз менен милицияга кайрылган. Бул факты боюнча териштирүү жүргүзүлүп жатканын облустук ички иштер башкармалыгынан кабарлашкан.

Ал эми Саламаттыкты сактоо министрлигинин аталган облустагы координатору адис ишин улантып жатканын билдирген.

Кара-Көл шаардык ооруканасынын жетекчиси дарыгерге колдоо көрсөтөрүн, аны иштен кетирбей алып калуу аракетин көрүп жатышканын белгилеген.