Сабырбек Жумабеков: "Иштен кет десе кетем, бирок мени менен кошо көп таланттуу дарыгерлер кетет"

Травматология, ортопедия жана илим изилдөө борборунун жетекчиси Сабырбек Жумабеков маалымат жыйын берүүдө. Анда министрдин ага карата дооматтарына жооп берди.

Министрдин дооматтары жеке инсандык таарыныч деп сыпаттады Жумабеков.

"Алты жылдан бери асылып келе жатат. Азыр да кайра-кайра текшерүүлөрдү жөнөтүүдө. Майда-чүйдө нерселер болот, албетте. Алардын жыйынтыгы менен эч бир олуттуу нерсе тапкан эмес. Текшерүүчүлөр өздөрү айтууда. Кайсы коррупция тууралуу айтып жатат билбейм. Ал эми жердештерин чогултуп алды дегени боюнча пайыз менен алганда, бул жерде иштеп жаткандардын 5-7 пайызы таластыктар. Азыр көп орундар бар, келишсе ала беребиз кимди болсо дагы", - дейт Жумабеков.

Андан сырткары эгер аны кызматтан кет деген буйрук чыкса кетүүгө даярдыгын айтты.

"Биз расмий жыйынтыкты күтөбүз. Эгер иштен кет деген чечим чыкса кетем. Бирок мен эле эмес, бул жердеги таланттуу дарыгерлер да мени кетирсе кетебиз деп айтышууда", - деди Жумабеков.

Кечээ саламаттык сактоо министри Алымкадыр Бейшеналиев кайрылуу жасап, "Жумабеков басып алган оорукананы элге кайтаруу керек" деген пикирин билдирген.