"Апасы баласына". Өлкөдө биринчи жолу бөйрөк алмаштыруу операциясы жасалды. Баасы канча?

Кыргыз өлкөсүндө расмий түрдө биринчи жолу бөйрөк алмаштыруу операциясы жасалды. Операция 28-январь күнү Бишкектеги Эне жана баланы коргоо улуттук борборунда жасалган.

Маалыматка ылайык, бүгүн, 3-февралда журналисттерге аталган улуттук борбордо пресс-тур уюштурулду. Пресс-турда дарыгерлер бөйрөктү алмаштыруу операциясы ийгиликтүү өткөнүн айтышты.

Дарыгерлердин айтымында, бүгүнкү күндө гемодиализге мамлекеттик бюджеттен жылына 1 миллиард 200 миң сом кетет. Ал эми бекер гемодиализди өлкө боюнча 3 миңге жакын адам алат.

Бөйрөк алмаштыруу операциясында ата-энесинин же бир туугандарынын эле бөйрөгүн алганга болот. Алгач бейтаптарды даярдаш керек. Ага лаборатория, шаймандар керек. Өлкөдө булардын көбүнчөсү жок. Ошондуктан башка өлкөгө лабораторияга барууга туура келет.

Учурда эне-баланын абалы жакшы. Операция 8 саатка чукул созулган. Бул учурда дарыгерлер эч жакка жылбастан бейтап жаткан керебеттин жанында турууга туура келет. Бөйрөктү алмаштыргандан кийин ал дароо иштеген. Учурда дарыгерлер бейтаптардын абалын калыбына келтирип жатышат.

Дарыгерлер өлкөдө бөйрөк алмаштырууга 7100 доллар керектелерин айтты. Операция кылган дарыгерлер акча албайт. Бул суммага бөйрөктү берген адамдын дагы, бөйрөктү алып жаткан адамдын дагы анализдери, лаборатория акысы кирерин айтышты.