Сокулукта сабалган 2 жашар баланын атасы: "Көрдүм, бирок бир нерсе кылуудан корктум"

Бир күн мурда Чүй облусундагы Сокулук аймактык ооруканасына 2 жашар бала оор абалда түшкөн. Анын сабалышы боюнча Чүй облустук ички иштер башкы башкармалыгы тергөө иштерин баштаганын, териштирүү иштери жүрүп жатканын кабарлаган.

Бүгүн, 4-февралда социалдык тармакка сабалган баланын атасынын билдирүүсү деген видео тарады. Андан баланын атасы жумуш берүүчүсү такай эле баласын жана аялын ур-токмокко алган деп айтканын угууга болот.

"Мен анын балага кылганын көрдүм, бирок бир нерсе кылып, кандайдыр бир чара көрүүдөн корктум. Анткени ал мени, үй-бүлөмдү жана балдарымды коркутуп, аялымды сабап, баламды майып кылып салды. Кечээ "Тез жардам" кызматына кайрылып балама медициналык жардам көрсөтүүсүн сурандык. Анткени баланын жыныс органында маселе болуп жаткан. Милицияны чакырдык. Жубайым иш берүүчүнүн үстүнөн арыз жазды", - дейт ата.

Эскерте кетсек, Чүй облусунун Сокулук районунда денесинен жаракат алган эки жашар бала аймактык оорукананын жандандыруу бөлүмүнө түшкөн. Кийинчерээк бала палатага которулганы, аны атасынын иш берүүчүсү сабаганы кабарланды.