"Бата алып". Сабырбек Жумабековду колдоп митингге чыккандар тарап кетишти (фото)

Бүгүн, 5-февралда Саламаттыкты сактоо министрлигинин алдына белгилүү травматолог Сабырбек Жумабековду колдоп митингге чыккандар тарап кетишти.

Митингге болжол менен 500гө жакын адам чыкты. Алар президент Садыр Жапаровдон Сабырбек Жумабековдун ордунда калуусун суранып, министр Алымкадыр Бейшеналиевдин отставкасын талап кылышты. Митингдин аягында митингге келген аксакал бата берип, акцияга чыккандар тарашты.

Кечээ, 4-февралда өткөн маалымат жыйында министр Алымкадыр Бейшеналиев Травматология, ортопедия жана илим изилдөө борборуна директордун милдетин аткаруучу болуп Гулия Кожокматова дайындалганын айткан.

Андан кийин министрдин орун басары аталган ооруканага барганда Сабырбек Жумабеков киргизе албай турганын айтып, Садыр Жапаровго кайрылуу жасап, президенттин гана чечимин күтөрүн айткан.