Жумабековду колдоо митинги: Митингдин катышуучулары резолюция түзүштү

Бүгүн, 5-февралда Саламаттыкты сактоо министрлигинин алдына чыккан митингчилер президент Садыр Жапаровго кайрылып, Сабырбек Жумабековдун ордунда калуусун, министр Алымкадыр Бейшеналиевдин отставкага кетүүсүн талап кылуу менен резолюция түзүштү.

Резолюцияга ылайык, Бишкектеги Травматология, ортопедия жана илим изилдөө борборунун мыйзамсыз шаардык Тез жардам клиникалык ооруканага өзгөртүүнүн токтотулуусу;

Бишкек шаарынын мэриясына караштуу Травмотология, ортопедия жана илим изилдөө борборунун директору, академик Сабырбек Артисбекович Жумабековду өз ордунда калтырылуусу;

Травматология, ортопедия жана илим изилдөө борборун өзгөртүүсүз калтыруу.

Саламаттыкты сактоо министри Алымкадыр Бейшеналиевдин ээлеген ордунан алынуусу талап кылынды.

Митингге болжол менен 500гө жакын адам чыкты. Арасында маданият өкүлдөрү да бар. Жыйынтыгында митингге келген аксакалдын бата берүүсү менен акцияга чыккандар тарашты.

Кечээ, 4-февралда өткөн маалымат жыйында министр Алымкадыр Бейшеналиев Травматология, ортопедия жана илим изилдөө борборуна директордун милдетин аткаруучу болуп Гулия Кожокматова дайындалганын айткан.

Андан соң министрдин орун басары аталган ооруканага барганда Сабырбек Жумабеков киргизе албай турганын айтып, Садыр Жапаровго кайрылуу жасап, президенттин гана чечимин күтөрүн айткан.