Индонезияда 12 жылга эркинен ажыратылган Кыргыз жараны өлкөгө кайтып келди

2010-жылы Индонезиянын Бандунг шаарындагы аэропортто тыюу салынган заттарды сактагандыгы үчүн кармалып, акыры Индонезиянын Жогорку Соту тарабынан 12 жылга эркинен ажыратылган Кыргыз жараны Ж.С. өлкөгө кайтып келди. Бул тууралуу Тышкы иштер министрлигинен кабарлашты.

"Элчилик Индонезиянын тиешелүү органдары жана аталган Кыргыз жараны менен тыгыз байланышта болгон. Анын жыйынтыгы менен 2019-жылы Ж.С. 2022-жылдын 22-январына чейин шарттуу түрдө мөөнөтүнөн мурда бошотууга өзгөртүлгөн.

Шарттуу түрдө бошотуу мөөнөтү аяктагандан кийин элчилик тарабынан Индонезиянын компетенттүү органдары менен биргеликте Ж.С.ны Кыргыз Республикасына кайтып келүүгө керектүү документтер даярдалган", - деп билдиришти министрликтен.

Тийиштүү иштердин жыйынтыгында, Кыргыз жараны Ж.С. 2022-жылдын 31-январында Кыргыз өлкөсүнө жөнөтүлүп, 2022-жылдын 2-февралында мекенине кайтып келген.