"Кандуу экен". Ырчы Анжелика Ысык-Көлдөгү бакты кыйышы боюнча түшүндүрмө берди

Ырчы Анжелика Кайратова былтыр кыздары, курбусу менен Караколго бара жатып жол кырсыгына кабылган. Анда унаа тайгаланып, бир тарабы жолдун четиндеги бакка урунган. Кырсыкка себеп болгон дал ошол бактын кыйылганы коомдо кызуу талкуу жараткан. Ырчы жол кырсыгына кабылган күндү эстеп, окуя тууралуу SUPER.KG порталына берген маегинде айтып берди.

"Уктап турсам да көз алдымда ошол бак тура берет. Балким, ал бак жок болсо түз талаага өтүп кетер белек деп ойлой берем. Бул аба ырайына жана жолдун тайгактыгына байланыштуу болду. Бизге чейин да ага урунуп, бир нече жол кырсыгы катталыптыр. Ошол айылдын дарыгерлери "силерге чейин да көп жолу жол кырсыгы болгон, кандуу дарак" деп айтышты. 30 жылдан ашуун убакыттан бери жол кырсыгы катталыптыр, тарыхы бар бак экен.

Бир жылдан кийин кырсык болгон жерге барып, кан чыгардык. Милиция кызматкерлери, Жашылдандыруу ишканасынын кызматкерлери менен сүйлөштүм. "Даракты кыйсак кандай болот, чирип деле калыптыр" десем, алар "жакында жолду кеңейтебиз, бул бактын баары алынат, сабыр кылып күтүп туруңуз" дешти. Акимчилик уруксат берип, бак кыйылды. Мен сүзүлгөнүмө жиним келгенинен улам барып кыйган жокмун. Унаанын ичиндеги төртөөбүз тең майыптык алдык. Мындай нерсени душмандарыма да каалабайм", - деди ырчы.