Улан-Батор-Бишкек багыты боюнча аба каттамын ачуу пландалууда

Монголиянын "Hunnu Air" авиакомпаниясы 6-марттан тарта Улан-Батор-Бишкек–Улан-Батор багыты боюнча аба каттамын ачууну пландоодо. Бул тууралуу Жарандык авиация департаментинен билдиришти.

Маалыматка ылайык, департаменттин директору Александр Настаев Монголиянын Кыргыз өлкөсүндөгү толук жана ыйгарым укуктуу элчиси Ганхуяг Содном менен жолугушту. Анда Кыргыз өлкөсү менен Монголиянын ортосунда туруктуу аба каттамдарын ачуу маселелери талкууланды.

"Hunnu Air" компаниясынын башкы директору Пуревжал Мунхжаргал Түркия жана Индияга каттамдарды уюштурууга кызыкдар экенин билдирди. Ал ошондой эле 6-марттан тарта Улан-Батор-Бишкек-Улан-Батор багыты боюнча аптасына бир жолу каттамдарды ишке ашыруу планын билдирди.

Александр Настаев белгилегендей, аба каттамдарды ачууга Жарандык авиация департаменти ар тараптуу жардам көрсөтөт. Монгол тарапка "Ош" жана "Ысык-Көл" эл аралык аэропортторуна каттамдарды ачуу, ошондой эле Кыргыз авиакомпаниялары менен кызматташууну карап чыгуу сунушталды.