Орусияда мигранттардын иштөөсүн чектеген тыюу салуулар боюнча элчиликтин жообу

Буга чейин Орусиянын 3 аймагында мигранттарды соода, коомдук транспорт, коомдук тамактануу тармагында иштөөгө тыюу салуу киргизилери маалымдалган. Кыргыз өлкөсүнүн Орусиядагы элчилиги бул чектөөлөр Кыргыз жарандарына карата колдонулбай турганын маалымдайт.

"ЕАЭБ жөнүндө келишимге ылайык, мүчө мамлекеттер улуттук эмгек рыногун коргоо максатында өз мыйзамдарында белгиленген чектөөлөрдү белгилебейт жана колдонбойт.

Эгерде Тюмень облусу, Калуга облусу, Ханты-Мансийсктеги орусиялык иш берүүчүлөр Кыргыз жарандарын ишке орноштуруудан баш тартуу фактылары болсо, элчилик электрондук почтага билдирүү жөнөтүүнү суранат", - дешет мекемеден.

Белгилей кетсек, Тюмень облусунун губернатору жергиликтүү транспорттук компанияларда патенттин негизинде иштеген чет элдик жарандарды жумушка алууга тыюу салган токтомго кол койгону кабарланган.

Ал эми Калуга аймагында чет элдик жарандарга коомдук тамактануу, транспорт жана чекене соода тармагында иштөөгө тыюу салынарын райондун губернатору Владислав Шапша билдирген.