"Кылмышты кылгым келген эмес". Талгат Шамиев жабырлануучу тараптан кечирим сурады

Бүгүн, 18-февралда Бишкек шаарынын Биринчи Май райондук сотунда Лимонти каймана аты менен белгилүү болгон кримтөбөл Алмазбек Сулаймановдун өлүмү боюнча соттук отурум болуп өттү.

Жыйындын жүрүшүндө соттолуучу акыркы сөздү айтты. Талгат Шамиев жабырлануучудан кечирим сурады.

"Ооба, менде кадимки жашоодо жашап, туризм тармагында иштөөгө мүмкүнчүлүк болду. Мен бул кылмышты кылгым келген эмес. Кылган ишим үчүн өкүнүп жатам. Жазаны жатак абакка же пробациялык көзөмөл түрүндө аныктап берсеңиз, мен үчүн пайдалуураак болот деп ойлойм. Адилеттүү өкүм чыгарууну суранам. Жабыркаган тараптан кечирим сурайм", - деди Шамиев ага берилген акыркы сөзүндө.

Сот Талгат Шамиевди он жылга эркинен ажыратуу чечимин кабыл алды. Ошондой эле жабырлануучу тарапка 100 миң сом компенсация төлөп берүүгө милдеттендирди.