"Жарык өчүшү мүмкүн!". Энергохолдинг элге кайрылуу жасады

Токтогул суу сактагычындагы суунун көлөмү азайып кеткендигине байланыштуу Улуттук энергохолдинг калкты электр энергиясын үнөмдүү пайдаланууга чакырды.

Билдирүүдө кечээ, 22-февралга карата Токтогул суу сактагычындагы суунун көлөмү 8 миллиард 400 миллион метр куб көрсөткүчкө чейин азайып кеткени, бул өткөн жылдын ушул мезгилине салыштырмалуу 1 миллиард 500 миллион метр кубга аз экени белгиленди.

"Электр энергиясын керектөөнүн андан ары өсүшү Токтогул суу сактагычында суунун азайышына жана керектөөчүлөрдүн өчүрүлүшүнө алып келиши мүмкүн. Буга байланыштуу Улуттук энергохолдинг калкты дагы бир жолу энергетика тармагындагы түзүлгөн кырдаалга түшүнүү менен мамиле кылууга жана электр энергиясын керектөөгө кам көрүүгө чакырат", - деп жазылат билдирүүдө.

Жалпысынан күз-кыш мезгилин ийгиликтүү өткөрүү үчүн өлкөгө 6-8 миллиард куб метр суу керектелет.