Ички иштер министрлиги Синьцзяндын полициясы менен онлайн жыйын өткөрдү

Кыргыз Республикасынын Ички иштер министрлиги Кытайдын Синьцзян-Уйгур автономиялык районунун полициясы менен онлайн жыйын өткөрдү. Бул тууралуу министрликтин басма сөз кызматынан билдиришти.

Маалыматка ылайык, 24-февралда Кытай Эл Республикасынын Синьцзян-Уйгур автономиялык районунун Коомдук коопсуздук департаментинин өкүлдөрүнүн жана Кыргыз Республикасынын Ички иштер министрлигинин кызматкерлеринин онлайн жыйыны болду.

Кеңешменин жүрүшүндө Кыргыз Республикасынын ИИМдин Эл аралык кызматташтык башкармалыгынын начальнигинин орун басары Олжобек Кеңешбек уулу эки тараптуу мамилелердин маанилүүлүгүн, КЭР СУАР Коомдук коопсуздук департаментинин достук мамилесин белгиледи.

Ошону менен бирге Олжобек Кеңешбек уулу Нарын облусунун Ички иштер башкармалыгынын милиция кызматкерлерине оргтехника түрүндө материалдык-техникалык колдоо көрсөткөндүгү үчүн ыраазычылык билдирди.

Өз кезегинде Синьцзян-Уйгур автономиялык районунун Коомдук коопсуздук департаментинин өкүлү Ван Мин Ды Кытай менен Кыргызстандын чек ара аймактарындагы коопсуздукту камсыз кылгандыгы жана мындан ары тыгыз кызматташууга умтулгандыгы үчүн кыргыз тарапка ыраазычылык билдирди.

Жолугушуу жылуу жана достук маанайда өтүп, тараптар укук коргоо ведомстволорунун учурдагы эки тараптуу кызматташтыгынын деңгээлин жогору баалашып, аны мындан ары өнүктүрүү ниеттерин билдиришти.