Екатеринбургда Кыргыз жарандарына алгачкы жолу айдоочулук күбөлүктөр берилди

Орусиянын Екатеринбург шаарында Кыргыз жарандарына алгачкы улуттук айдоочулук күбөлүктөр берилди. Бул туууралуу Тышкы иштер министрлигинен билдиришти.

Маалыматка ылайык, айдоочулук күбөлүктөрдү Екатеринбург шаарындагы башкы консул Руслан Бийбосунов тапшырды.

"Башкы консулдук Орусиянын Урал регионунда жүргөн Кыргыз жарандарынан улуттук жана эл аралык айдоочулук күбөлүктөрдү алмаштыруу үчүн документтерди 2022-жылдын 17-январынан тарта кабыл ала баштаган.

Ошол убакыттан бери кабыл алынган документтердин негизинде айдоочулук күбѳлүктѳр Бишкекте жасалып, биринчилери Екатеринбургдагы Кыргыз өлкөсүнүн консулдук мекемесине келе баштаган", - деп жазылат маалыматта.

Эске салсак, Орусияда эмгектенген Кыргыз жарандары 17-январдан тарта айдоочулук күбөлүктөрүн Кыргыз өлкөсүнүн Орусиядагы дипломатиялык өкүлчүлүктөрүнөн жана консулдук мекемелеринен алмаштыра алышары айтылган.