"Кызым менен күйөө балам 5 баласын таштап ичип кетишти". Неберелерин карызга батып баккан таененин тагдыры

51 жаштагы Назгүл Өмүрбаева Жайыл районунун Сосновка айылында турат. Ал учурда кыйын күндү баштан кечирүүдө. Анын кызы менен күйөө баласы ичкиликке берилип, баш оогон жакта басып жүргөндөрүнө байланыштуу 5 жээнин жалгыз багып келет. Жардамга муктаж таене SUPER.KG порталына оор тагдыры тууралуу айтып берди.

"Күйөө балам башынан ичет. Кызым да ага эрегишип ичип кетти. Кызымдын чөйрөсү да начар болчу. Алты ай мурун эки бөлмөлүү үйүмдү кыз-күйөөмө таштап, иштеп кеткем. Көп өтпөй кошуналарым чалып, "кызың менен күйөө балаң баягысындай ичип кетти. 5 баласы каралбай калды" деп айтышты. Шашып келсем үйгө милиция келип, балдарды социалдык кызматкерлер алып кеткени жатышыптыр. Мен жээндеримди ар кайсы жакка таратып жибергим келген жок. Өзүм мыйзамдуу түрдө асырап алдым.

Кызым менен күйөө балам ошол окуядан кийин үйдөн чыгып кетишкен. Кызым орто жолдо келип үйдө жатып кетип жүрдү. Экөөнүн тең балдары менен иши жок. Учурда кайда, эмне кылып жүргөндөрүн билбейм. Күйөө баламдын туугандары жок. Өзүмдүн үч балам бар. Алардын улуусу 5 неберемдин энеси. 1992-жылы туулган. Андан кийинки уулум үйлөнүп, шаарда өз алдынча турат. Кичүү баламдын буту сынып шаарда жатат. Жолдошум менен жаш кезимде ажырашып кеткем. Ал дагы ичкиликке берилген неме болчу. Азыркы күнгө чейин ичип жүрөт.

Балдар үчүн жөлөк пул ала албай жатам. Балдарды бакканым үчүн да социалдык фонддон акча бөлүнмөк. Бирок майда-барат документтерди сурай берип эзишти. Аларын чогултканга убактым жок. Чогулткан күндө ар шылтоону айтып жатышат. Неберелеримдин кийимдери жыртык, курсактары ач. Өкмөттөн жардам жок болгондуктан анда-санда идиш жууп иштеп 400 сом табам. Балдарды караганга менден башка киши жок болгондугуна байланыштуу туруктуу жумушум жок. Жээндердин улуусу 10, кичүүсү 3 жашта. Аларды бала бакчага берүүгө да мүмкүнчүлүгүм жетпейт. Учурда кошуналардан жардам сурап, дүкөндөргө карызга жазылып балдарды багып жатам", - деди ал.