Депутат Балбак Түлөбаев той-ашка кошумчаны алтын менен алып барууну сунуштады

Той-ашка кошумчаны алтын менен алып барууну салтка айлантсак деген сунушун Жогорку Кеңештин депутаты Балбак Түлөбаев Фейсбуктагы баракчасына жазды.

Анда Түркияда жамандык-жакшылыкта кошумчага алтын алып баруу салт экенин мисал келтирген.

“Калайык, шарт болуп калса! Баары бир той-ашка кошумча кошобуз. Түрктөрдө ушундай салт бар, тойлорго кошумча алтын алып барышат. Мына, бизде да ушундай шарт түзүлдү. Экономикага да пайда болот, казынага да акча түшөт. 1 граммдан 100 граммга чейин, чөнтөккө жараша биз деле ушуга өтсөк болот эле. Бардык банктардан сатып алганга шарт түзүү керек. Алтын ар дайым баа”, - деп жазган депутат.

Буга чейин президент Садыр Жапаров жарандарды акчаны алтын менен сактоого чакырып, "алтын кунун жоготпойт" деген пикирин айткан.