Лебединовкада окуучуну урушкан деп жумуштан кеткен мугалим кайра ишине кайтты (сүрөт)

Чүйдүн Лебединовка айылындагы №1 мектеп-гимназияда тарых мугалими менен окуучунун ортосунда чыр чыгып, анын кесепетинен мугалим иштен кеткен. Ал кайра ишине кайтып келгенин Билим берүү жана илим министрлиги маалымдайт.

"Лебединовкадагы №1 мектеп-гимназиянын тарых мугалими Жылдыз Садырбаева өзү иштеп кеткен мектепке кайтып келди. Анын ишке кайтуусуна өз кесибине болгон сүйүүсү, өзү окуткан окуучулардын ата-энелеринин суранычы, ошондой эле министрликтин колдоосу түрткү берди", - дешти министрликтен.

Белгилей кетсек, 21-январда Лебединовкадагы мектептин тарых мугалими менен 8-класстын окуучусунун ортосунда чатак болгон. Андан кийин Аламүдүн райондук мамлекеттик администрациясынын башчысынын орун басары, Аламүдүн райондук билим берүү бөлүмүнүн башчысы жана кызматкерлердин катышуусунда жыйын болгон. Жыйындан кийин тарых мугалими өз каалоосу менен жумуштан кетүү боюнча арыз жазып, иштен кеткен.