Нефтетрейдерлер ассоциациясы күйүүчү майлар дагы да кымбатташы мүмкүн экенин билдирди

Доллардын баасынын көтөрүлүшүнө байланыштуу күйүүчү жана майлоочу майлардын баасы кымбатташы мүмкүн. Бул тууралуу Нефтетрейдерлер ассоциациясынын жетекчиси Канат Эшатов "Биринчи радиого" берген маегинде билдирди.

"Орусиядан күйүүчү-майлоочу майларды ташып келүү боюнча келишимдери доллар менен жүргүзүлөт. Доллардын кымбатташы бир литр бензиндин баасынын 60 тыйынга кымбатташына алып келет" - деди Эшатов.

Ошондой эле жазгы айдап-себүү иштерине күйүүчү майдын жетиштүү запасы бар экенин билгиледи.

Эске салсак, акыркы эки жумада доллар 14 сомго кымбаттаган.