Эки өлкөнүн дипломатиялык мамилелерине 30 жыл. Владимир Путин Садыр Жапаровго куттуктоо жолдоду

Орусиянын президенти Владимир Путин президент Садыр Жапаровго эки өлкөнүн ортосундагы дипломатиялык мамилелердин түзүлгөндүгүнүн 30 жылдыгына карата куттуктоо жолдоду. Бул тууралуу президенттин администрациясынан билдиришти.

"Бул убакыт аралыгында орус-кыргыз мамилелери стратегиялык өнөктөштүк жана союздаштык деңгээлине жетти. Ар түрдүү чөйрөлөрдө мазмундуу саясий диалог жана ар кандай тармактарда жемиштүү кызматташтык өнүгүп жатат. Москва менен Бишкек ЕврАзЭСтин, ЖККУнун, КМШнын, ШКУнун жана башка көп тараптуу түзүмдөрдүн алкагында натыйжалуу өз ара аракеттенүүдө.

Биздин дос элдерибиздин жыргалчылыгы үчүн, аймактык туруктуулукту жана коопсуздукту чыңдоо кызыкчылыгында эки тараптуу мамилелердин бүткүл комплексин биргелешкен күч-аракеттер менен мындан ары өнүктүрүүнү камсыздайбыз деп ишенем", - деп айтылат куттуктоо текстинде.

Владимир Путин Садыр Жапаровго бекем ден соолук жана ийгилик, ал эми бардык кыргыз элине тынчтык жана бакубатчылык каалады.